Маја Виденовиќ и Владимир Трајковиќ, како претставници на Центарот за иновации и дигитална едукација Диг-Ед, имаа задоволство да учествуваат на ALL DIGITAL Summit 2026, кој се одржа на 22 и 23 септември 2026 година во Белград, Србија.
Под мотото „Дигитална благосостојба за конкурентна Европа“ (Digital Wellbeing for a Competitive Europe), Самитот обедини едукатори, креатори на политики, истражувачи, иноватори, претставници на граѓанскиот сектор и индустријата од цела Европа, создавајќи простор за размена на различни перспективи и заедничко размислување за тоа како да изградиме дигитална иднина која не е само иновативна и конкурентна, туку и насочена кон човекот, инклузивна и одговорна.
За време на Самитот беа разгледани некои од клучните прашања поврзани со забрзаната дигитална трансформација – од вештачката интелигенција и новите технологии, до дигиталните вештини, етиката, довербата, инклузијата и дигиталната благосостојба. Различните сесии овозможија споделување искуства, дискусија за актуелните предизвици и за начините на кои технолошкиот развој може да придонесе кон позитивни промени, притоа задржувајќи ги луѓето и нивната благосостојба во центарот на вниманието.
За Диг-Ед, овие теми се тесно поврзани со нашата работа и посветеноста да им дадеме поддршка на наставниците и учениците во процесот на дигитална трансформација. Дискусиите понудија и перспективи за тоа како организациите што работат во областа на дигиталното образование можат да одговорат на новите предизвици, истовремено поттикнувајќи иновации, инклузивност и одговорна употреба на технологијата.
Покрај самите сесии, еден од најзначајните аспекти на Самитот беше можноста за средби и повторно поврзување со колеги од различни европски земји, размена на искуства и идеи и запознавање со нови иницијативи и пристапи. Разговорите со организации и професионалци кои работат во различни области на дигиталното образование отворија простор за нови контакти и можности за идна соработка.